KOMINIKE (SDP)

KOMINIKE
«Jovenel ale men PHTK ranfòse. Sektè Demokratik ak Popilè a di non!»
8 mwa Ariel HENRY sou pouvwa ak 6 mwa aprè akò 11 septanm lan timari pa monte timari pa desann. Nou anmod kita nago, se komsi Jovenel te toujou prezidan peyi a, li menm rive ranfòse tèt li paske tout moun fè silans pandan peyi a ap peri.
Ensekirite ap vale teren, kidnapin nan vinn tabli kò l pi plis nan peyi a kote pèsonn moun pa epanye, Matisan ak Kwadeboukè tounen kalfou lanmò tèlman bandi ak zam se yo k ap fè lalwa nan zòn sa yo. Premye minis defèt la ap flannen, ap dirije ak tweet pandan Lapolis genlè pa jwen kòb pou l aji kont bandi.

 6 mwa aprè siyati akò 11septanm lan anyen pa di sou masak lasalin Bèlè Site Solèy Kafou Fèy, Mariani pandan moun ki gaspiye kòb Petrokaribe ap flannen sa kè sote.

 6 mwa aprè siyati akò 11 septanm lan tout dekrè selera Jovenel yo rete kanpe doubout, delege vis delege, majistra, CASEK, ASEK, Komisè Gouvènman, Sibtiti yo tout ap taye banda mete sou sa PM Ariel friz administrasyon piblik pou PHTK e alye avèk yon sikilè madichon.
 Sou 18 pòs ministeryèl Ariel chanje sèlman 9 e nan 9 lan se sèlman 2 ki soti nan opozisyon an tout rès yo se PHTK e alye yo ye, direksyon jeneral ki chanje yo se zanmi ak fanmi PM Ariel, PHTK e alye li mete ladan yo.
 Sa Jovenel pat janm ka fe Ariel rive monte gaz la sou do Pèp la lavi chè a ap toufe popilasyon an.
 6 mwa aprè siyati akò 11 septanm lan dosye asasina Me Dorval la, Gregory Saint- Hilaire, Eveline Sincère, Duclaire Antoinette e Diego pa fe you pa kita you pa nago, zafè kat Demalog la toujou kanpe djanm nan figi pèp la.
Pòtoprens, vandredi 11 mas 20022

 6 mwa aprè siyati akò 11 septanm lan dola ameriken pa janm sispann kontinye grenpe nan enterè PHTK ak alye, ki kote sa ap rive nou pa konnen, Diaspora toujou pa kapab voye efè pèsonèl yo nan dwann Senmak ak nan Miragwàn. Malgre divès òganizasyon andedan sosyete a mande bonjan odit nan òganis otonòm yo tankou ONA, OFATMA, BMPAD, Ladwann, OAVCT, APN, AAN, OFNAC, san nou pa bliye administrasyon piblik la, Lakou dèkont toujou rete bèbè jouk jounen jodi a. Misyon diplomatik yo ki gen anpil eskandal koripsyon jiskaprezan se PHTK ki okipe yo de okton jiska anbasadè.

 6 mwa aprè siyati akò 11 septanm lan lajistis preske pa ekziste, prizonye politik kontinye ap kroupi nan prizon, aparèy jistis la efondre paske minis ki la pa fè anyen pou amelyore sistèm jistis la.
 Leta menase nan ekzistans li menm. Misyon monte misyon desann nad marinad.
Ariel Henry ap dirije peyi a san konsansis politik nan mitan akò 11 septanm lan ak tout lòt group k ap feraye nan peyi a. Nan mitan you kalfou danjere konsa fòs politik sosyal ak ekonomik nan peyi a dwe kanpe diriv sa yo ki fè pèp ayisyen an ap monte le syèl pa do.

Moman rive pou pèp la nan tout konpozant li konstwi yon altènativ nasyonal san fòs kote pou retire peyi nan boubye li ye jounen jodi a.
Nan moman nou ye la, nou pa k ap tann blan men jodi a kongrè ameriken di li pa konn pouvwa k ap dirije peyi a.

Si zansèt nou yo te fè 1804 malgre tout limit yo te genyen nan ekòp sa, nou kapab fè l ankò jodi a.

ANN KONSTWI ANSANM YOU LOT AYITI! Pou Sektè Demokratik ak Popilè a :
Senatè Nènel CASSY Minis Marjory MICHEL Me André MICHEL, Av. Dp Ulrick SAINT-CYR

À propos de l’auteur