Actualités

Ayiti: Biwo Swivi Akò (BSA) Montana ak kolektif 30 janvye, entèpele Prezidan Edgard Leblanc fas ak akizasyon kòwipsyon sou 3 manb konsèy prezidansyèl la, nan yon lèt tou louvri.-

3 min de lecture

2 ans il y a BLAISE Robelto Flanky

Pòtoprens, 9 Out 2024 – An Ayiti, Biwo Swivi Akò Montana (BSA) ak Kolektif Pati Politik 30 Janvye voye yon lèt ouvè bay Prezidan Konsèy Prezidansyèl Transisyon an (CPT-KPT), Edgard Leblanc, pou eksprime gwo enkyetid yo fas ak akizasyon kòwipsyon ki vize kèk manm CPT a. Depi Konsèy sa a te enstale 25 Avril 2024, gen akizasyon malvèsasyon ki kòmanse sikile, e sa lage lonbray sou kredibilite ògan egzekitif la ki sou pouvwa a.

Men lèt yo adrese ak prezidan Edgard Leblanc.pdfTélécharger

Nan lèt sa a, moun ki siyen yo, ki di yo atache ak prensip etik ak moralite piblik, deplore silans kontinyèl egzekitif la devan akizasyon sa yo. Dapre yo, dènye revelasyon ki fèt konsènan yon tantativ kòwipsyon dokimante nan yon lèt Prezidan Konsèy Administrasyon Bank Nasyonal Kredi (BNC) ekri, ansanm ak yon plent ki depoze nan ULCC (Inite Lit Kont Kòwipsyon), sali kredibilite gouvènman an epi menase pou sabote pwosesis tranzisyon politik la ki te lanse pa Akò 3 Avril 2024 la.

Yon silans ki enkyetan

« Li enposib pou Egzekitif la, ki konstitiye ak yon Konsèy Prezidansyèl Transisyon kote ou gen privilèj pou w prezide, rete an silans devan gwo sispisyon kòwipsyon ki tonbe sou kèk manm li yo, » lèt la deklare. BSA ak patnè li yo kwè ke silans sa a pa sèlman ka minen konfyans pèp ayisyen an, men li kapab mete an danje efò estabilizasyon ak refòm ki angaje nan tranzisyon an.

Biwo Swivi Akò Montana ap mande Prezidan Leblanc pou pran mezi ijans pou retabli konfyans piblik la. Yo mande l’ sitou pou l’ pran « mezi konsèvatwa » kont konsèyè ki enplike yo, pou pèmèt lajistis fè travay li san pwoblèm. BSA ensiste tou sou nesesite pou mennen yon ankèt entènen pou anpeche lòt zak kòwipsyon e pou fè yon odit jeneral nan administrasyon piblik la, selon dispozisyon Akò 3 Avril la.

Apèl pou aksyon konkrè

Anplis aksyon imedyat sa yo, BSA mande Prezidan Leblanc pou respekte angajman ki te pran nan Akò 3 Avril 2024 la, lè l’ ap aplike yon pwojè konsansyèl pou transfòme sosyete ayisyen an nan lapè. Sa gen ladan l’ kreye yon gouvènman inyon nasyonal, mete sou pye yon ògàn kontwòl tranzisyon an, ansanm ak preparasyon pou òganize eleksyon transparan d’ici 7 Fevriye 2026.

Fas ak gravite sitiyasyon an, BSA ak Kolektif Pati Politik 30 Janvye afime volonte yo pou antre nan diskisyon transparan ak lòt aktè politik ak sosyete sivil la pou elaji konsansis la nan lit kont kòwipsyon ak enpinite.

Nan ap tann yon repons Prezidan Leblanc, lèt la fini ak yon apèl pou dyalòg ak aksyon pou redrese sitiyasyon politik aktyèl la epi evite peyi a plonje nan nouvo kriz.

À propos de l’auteur

BLAISE Robelto Flanky

Blaise Robelto Flanky est journaliste, rédacteur en chef et PDG de LakayInfo. Formé en rhétorique et communication persuasive à Harvard University, en relations internationales au CEDI, ainsi qu’en psychologie à l’UFCH, il s’intéresse particulièrement aux questions politiques, géopolitiques et sociétales. À travers Lakay Info, il œuvre à promouvoir une information rigoureuse, indépendante et accessible.

Contact : [blaiserobelto.f@gmail.com](mailto:blaiserobelto.f@gmail.com)

See author's posts